1968
Hän drei jungi Bursche uss em Breiti- / St. Alban-Quartier d Runzle-Bieger Waageclique grindet.
Am Cortège vo dr Fasnacht 1969 sin denn acht Waggis zem erschte Mool uff e-m-ene Sujet-Waage – bi strömendem Rääge notabene – in nigel-nagel-neye Larve und Goschdyym drby gsi.
1972
Obwohl im Lauf vo de Joor dr Frindinne, Fraue- und Passive-Kreis vo de Runzle-Bieger immer grösser worde isch, sin uff em Waage nur Männer duldet gsi.
1976
Bereits hän die uff em Waage verschmääte Fraue als Runzlegumsle vor em Waage als Vortraab mit Requisit aggtiv an dr Fasnacht mitgmacht. Well uss de aggtive Vorträäblerinne aber gly aggtivi Pfyffere worde sin, hän einigi Wäägeler agfange, sich au dääre Kunscht z‘ widme.
1977
Isch in vyyl Fronarbet an dr Hammerstrooss dr erscht Cliquekäller, und mit däm unser ney Iebigslokal, yygrichtet worde. Me het fescht am neye Clique-Bild gschafft und isch dangg e-m-ene Ladäärnemooler uss de aige-ne Raaie zem 10-jäärige Jubiläum mit eme stattlige Zug vo 6 Vorträäbler mit Requisit und Ladäärne, 8 Pfyffer und nadyrlig mit Waage uff d‘ Route. Nach intensive Drummelstunde vo finf Wäägeler isch denn vier Joor speeter uss de ehemolige 8 Waggis e Spiil vo siebe Vorträäbler, eme Dutzend Pfyffer und finf Drummler worde.
1984
Isch es denn passiert! Dr Waagebau het stargg an Inträsse verlore und die ledschde drey Waggis hän ihri Larve an Nagel ghänggt. Ebbe säggs Joor het die neyi Formation, als Pfyffer- und Dambuuregruppe, ihre Bestand kenne uffrächt halte. In die Zyt isch au dr Uffbau vom neye Cliquekäller gfalle.
1990
Sin denn ainigi fasnachtsmied worde oder hän aifach dr Cortège nimm welle laufe. Es het gräblet und vom stolze Bestand sin no finf yserni Runzle-Bieger übrig bliebe. Uffgä oder Fusioniere, dasch jetzt die grossi Froog gsi. S‘ Erscht het me ganz inne stargg verdrängt! Dangg eme ‚gligglige‘ Umstand, dass d’Hypokrate – e anderi 10 Joor alti Pfyffer- und Dambuuregruppe – ’s glych Problem gha hän, isch e Zämmeschluss immer necher koo. Noch ere gmainsame Probe-Fasnacht isch dr Fusion nyt me im Wääg gschtand
1992
Isch es sowyt gsi!!! Die neye RUNZLEBIEGER mit 12 Pfyffer/inne, 5 Dambuure, 1 Major und ere Hampfle Vorträäbler mit Ladäärne und Requisit sin mit neyem Elan uff em Cortège drby. Dr Edi het s‘ Drummelkommando überno und die Dambuure afo schlyffe.
1993
het dr grandiosi 25 Joor Jubelbummel im Aemmital stattgfunde. Und so sin die witere Joor vergange, ai Fasnacht prächtiger als die Anderi.
1997
hets witere Zuewachs gää – sin doch grad 5 Pfyffer/inne vo de Schimmlige zue nis gstosse, was nomol e massivi Verstärgig bedütet het.
1998
bereits dr 30 Joor Jubelbummel in Bremgarte mit dr legendäre Bootsfaart uf dr Reuss.
2000
au d‘ Milleniumsfasnacht überstöön mir prächtig.
2003
dr 35 Joorbummel zieht is in d Innerschwiiz – vo Arth Goldau zum Seelisbärg ins Hölloch vom Muotathal. Im Herbscht 2003 heisst ’s Hand alege: dr Cliquekäller wird renoviert, e neye Bode verlegt und d’Wänd frisch gstriche.
2006
git dr langjäärigi Obmaa René si Amt ab. Aber unseri Lampe duet är witerhin mit grosser Begeischterig mole.
Am 21.12.2007 die truurigi Noochricht vom plötzlige Tod vo unserem lang- jäärige Dambuurmajor Blööderli wo dr Clique sit fascht am Afang d Treui ghalte het.
2008
sit 40 Joor drby. Mir verbringe bi Bombe-Wätter zwei super Dääg im Appezäll.
2013
Das Joor hänn mir an de Öbe und am Bummel gmainsami Umgäng mit dr BZG gmacht.
Das isch dr Plausch gsi und d F2014 wänn mir mit eme gmainsame Sujet zämme mache.
Mir iebe das Joor zämme aimol in ihrem und s ander Mol in unserem Käller.
Jubelbummel 2013
sit 45 Joor drby Mir jubiliere e grandioses Wuchenänd im Bündnerland uf Burg Ehrenfels und in dr Tamina Schlucht ob Bad Ragaz.
2014
Die gmeinsami Fasnacht mit dr BZG het guet harmoniert und isch e Berycherig gsi. Unsere langjäärige Ladäärnemooler René leggt au dr Pinsel uf d’Syte und ney moolt dr Däge die gmeinsami Lampe. Me isch dr Meinig gsi, me wiederholt die zämmegwürfleti Fasnacht nomoll im 2015 bevor me über Fusione debattiert.
Im Lauf vom Friehlig 2014 hän aber dr Vorstand und e paar Vorträbler vo dr BZG pleetzlig Angscht beko d‘ Runzlebierger welle si grad schlugge und gar nit fusioniere. Dr Rubi Vorstand het die Akündigung mit Beduure und Befremde zur Kenntnis gnoo umsomehr als BZG im 2015 ir 50 jöörigs Jubiläum zelebriert.
Die fünf aggtive BZG Pfyffer/Inne hän dä Entscheid nit akzeptiert und sin sofort usträtte und mit no 2 Vorträbler und eim Tambour zu uns Rubi überträtte.
So hän mir jetz e respeggtabli Pfyffergruppe vo 15 Lyt und fünf Dambuure zämme für d’Fasnacht 2015.
Au im Rubi Vorstand gits e Mutation, die mehrjäärigi Obfrau Barbara git ir Amt an d’Pascale wyter.
2015
Dä Zuewachs und d’Verstärggig hänn phantasitisch ygschlaage und mir hän e harmonischi Fasnacht verbrocht.
2016
Au die Fasnacht gniesse mir bi tollem Wätter aber leider nur mit drey Dambuure. Aber Verstärgig isch in Sicht. E Tambourin und e Tambour wärde vom Instruggter Mike gschliffe und könne hoffentligg uf s’2017 ire Ystand gää.
2017
Dr Gotthard Zug vo Nord no Süd ischydrüggligg gsi und het leider no underem zum Teil stargge Rääge glitte.
2018
Gits e Jubiläum
** 50 Joor drby **
2024
An unserer 56. Fasnacht laufe mir in Cliquepartnerschaft mit de Grottegyggser
2025
An dr 57. Fasnacht sinn mir wieder unter uns. Interessierti Gruppe für e Cliquepartnerschaft oder au einzelni Fasnächtler und Fasnächtlerinne dörfe sich gärn bi unserem Obmaa mälde.
